Jonas (Jovva) Barruk

Daesnie åadtjode göökte gihtjehtimmieh govledh mejtie Lajla Mattsson Magga darjoeji 1978. Desnie Jonas jïjtjemse sov saemien nommine åehpiedahta, Jovva.

Altese aehtjie lij Nils Engelbrekt Barruk. Dan fuelhkie bovtsigujmie gïehteli Vualtjeren noerhte sïjtesne, men jaepien 1920 tjoerin Vaapsten sïjten gåajkoe juhtedh dan åvteste fer jïjnje bovtse Vualtjeren noerhte sïjtesne. Altese tjidtjie Maria, lij Elsa Laula Renbergen nuerebe åabpa. Dej eejhtegh lin Lars Thomasson Laula jïh Kristina Josefina Larsdotter. Dah guaktah tjåanghkan 10 maanah åadtjoejigan, jïh 5 dejstie geerve aalterem jaksin.

Voestes gihtjehtimmesne soptseste gubpede altese fuelhkie bööti, dovne tjidtjeben jïh aehtjeben bielesne.  Jovva soptseste satne eelki meatan årrodh barkosne bovtsigujmie joe gosse lij maana,  jïh åadtjoeji dejtie geerve almetjidie dåeriedidh ryöjnesjidh.

Dïhte akten aejkien bïjre soptseste gosse aktem gujnem dåeriedi man nomme Sagka. Aalkoelisnie ligan ektesne gosse ryöjnesjeminie, men gosse Sagka tjoeri mïnnedh såemies bovtsh veedtjedh, dellie guhkebem gaatoeli goh Jovva lij aerviedamme. Jïh idtji daejrieh gusnie Sagka lij. Maam dellie darjoeji? Dïhte eajhnadovvi maam akt joekoen væjsehke darjodh, jïh mij dïhte lij maahtah daesnie govledh.

Tjojefijle: Ryöjnesjeminie

Mubpene gihtjehtimmesne soptseste guktie lij åarjelsaemien gïeline don baelien satne skuvlesne veedtsi, amma boelhken 1915 raejeste medtie 1922 raajan. Dïhte tjïelkelaakan soptseste saemien lij dej ietniengïele jïh dïhte gïele maam bööremeslaakan meehti gosse skuvlese böötin. Men skuvlegïele lij sveerjen, jïh jïjnjem jeerehti man jïjnjem maanah sveerjen gïeleste meehtin gosse skuvlesne eelkin. Lissine dan sveerjen gïelese maam skuvlesne lïerin dah sveerjen lïerin gosse sveerjen voelpigujmie stååkedin daelvielaantesne.  Men gosse giesielaantese juhtin gïjrege, meehti guhkiem vaasedh åvtelen jeatjah gïelem govlin goh saemien.

Tjojefijle: Guktie lij åarjelsaemien gïeline don baelien satne skuvlesne veedtsi