Paul Vesterfjell – Viesterviellien Pöövle
Daah baantedimmieh Viesterviellien Pöövleste leah akte bielie tjoejematerijelleste saemien dajvijste mah sïjse tjöönghkesovvin Noerhtelaanti saemien instituhteste (NSI) 1980-låhkoen aalkoelisnie. Lajla Mattsson Magga baantedimmide darjoeji 1982 jïh dah leah åarjelsaemien.
Mænngan goh Noerhtelaanti saemien instituhte akte bielie sjïdti Sámi allaskuvleste/ Saemien jïlleskuvle, dïhte sïjse tjöönghkeme tjoejematerijelle Saemien våarhkose sertesovvi. Jaepien 2016 Saemien våarhkoe lea måedtiem daehtie materijelleste daan beajjetje digitaale hammose jeatjahtahteme, gaskem jeatjah daejtie baantedimmide Viesterviellien Pöövleste. DigForsk AS lea digitaliseradimmiem jïh tjoejebueriedimmiem baantedimmijste dorjeme. Lill Westerfjell Kalstad dïedtem åtneme baantedimmide veeljedh mejtie daesnie åehpiedehtebe, jïh dïhte aaj web-teekstide dorjeme.
Baantedimmiej bïjre
Dennie voestes baantedimmesne akte soptsese maam Pöövle lea soptsestamme ovmessie ektiedimmine, Dah golme åerpenh. Daate versjovne baanten sïjse spealadin ovrehte seamma tïjjen goh soptsese bæjhkoehtamme sjïdti Saemien Sijten voestes jaepiegærjesne, Åarjel-saemieh/Samer i sør 1982/83. Akte versjovne soptsesistie aaj Saemien Sijten våarhkosne Digitalt museumisnie, vuartesjh svaalhtesem vuelielisnie. Daam bantedimmiem Åsta Vangberg darjoeji 1980. Gïelem Nastedh aktem sjïehtesjamme versjovnem soptsesistie bæjhkoehtamme goh maanagærja jaepien 2013.
Pöövle lij akte væjkele soptsestæjja aerpievuekien daajroen bïjre, jïh dejnie baantedimmine sov daajroem mijjine juaka. Gaskem jeatjah veelelaakan buerkeste guktie edtja dejtie bööremes gaamegasside veeljedh gosse edtja novhtehkh gåarodh.
Dijjieh maehtede daejtie teemide goltelidh:
Mijjieh voerkelibie mijjieh ajve tjoejem bueriedamme jïh ibie maam baantedimmine jeatjahtahteme.
- Dah golme åerpenh
- Moeretjoehpemen bïjre
- Guktie bïenje mubpiejgujmie soptseste
- Guktie edtja veeljedh dam skoerhtjem mij maahta hijven ryöjnesjimmiebïenjine sjïdtedh
- Mij baarhkojde bööremes sjeahta gosse edtja skåerriem båårhkesjidh
- Gaamesh njelledh jïh spaanestidh
Paul Vesterfjell - Viesterviellien Pöövle (1921 – 2000) reakasovvi Viknesne, gusnie fuelhkie lij krievvine don daelvien. Dïhte Bindalesne byjjeni jïh Nååmesjevuaman juhti gosse geerve almetjinie sjïdteme. Dïhte bovtsigujmie gïehteli stoerre bieline sov jieliedistie, men aaj skåajjesne jïh ruevtieraajrosne barki. Pöövle lij akte joekoen tjiehpies soptsestæjja, jïh joekoen lyjhki maanide soptsestidh. Akten boelhken lij aaj meatan Åarjelhsaemien teaterisnie.
Stiftelsen Saemien Sijte lea jeatjah baantedimmieh dorjeme Viesterviellien Pöövline jïh dejtie åehpiedahteme sijjesne digitaltmuseum.no