Foto: Vegard Breie/Arkivverket
Ny bevaringsforskrift sendt på høyring
Forslaget til ny bevaringsforskrift er no sendt på høyring. Forskrifta regulerer kva dokumentasjon som skal takast vare på for ettertida, og er meint å erstatte kapittel 7 i Riksarkivarens forskrift. Lov om dokumentasjon og arkiv (arkivlova) blei vedteken i juni, og arkivforskrifta blei sendt på høyring tidlegare i haust.
– Bevaringsforskrifta er avgjerande for at vi skal sikre samfunnets dokumentasjon for framtida. Med ny struktur og forbetra språk blir det enklare å bruke forskrifta i praksis, seier riksarkivar Inga Bolstad.
Bakgrunnen er at Stortinget har vedteke ny lov om dokumentasjon og arkiv (arkivlova) som tek til å gjelde 1. januar 2026. Lova erstattar dagens arkivlov og gir Nasjonalarkivet heimel til å fastsetje forskrift om kva dokumentasjon som skal bevarast for ettertida, jf. § 12 andre ledd.
Framlegget inneber i hovudsak ei vidareføring av gjeldande reglar, men språket og den innholdsmessige oppbygginga er endra. Skriftspråket er nynorsk, i tråd med ny arkivlov og ny arkivforskrift, og målet er at forskrifta skal vere meir brukarvenleg og lett å lese. Rettleiingsmaterialet som finst til gjeldande reglar, vil framleis kunne nyttast.
Bevaringsforskrifta inneheld òg nokre nye reglar som følgje av den nye arkivlova og framlegget til ny arkivforskrift. Samstundes er dette først og fremst ei teknisk og språkleg oppdatering. Det vil seinare bli sett i gang arbeid med ein fullstendig revisjon av innhaldet i bevaringsreglane.
Høyringa har saksnummer 2025/13794. Arkivverket oppmodar alle berørte til å gi sine innspel.
Fristen for å sende inn høyringsfråsegn er 28. november 2025.